CAGAYAN DE ORO CITY – Mag-atubang sa patung-patong nga kasong kriminal ang pipila ka giingong mga sundalo nga sakop sa 58th IB,Philippine Army nga gitudlo nga nalambigit sa pagpanulis sa lungsod sa Villanueva,Misamis Oriental.
Kini human madakpi sa mga pulis sila si Cpl Joel Cabahug,Pvt Reyboden Hilogon,Cpl Clint Sumaya,CAFGU members John Carlo Solde nga pulos taga-lalawigan ug retired AFP member Aladino Hulleza nga residente usab ning syudad.
Gibutyag ni Maj Dennis Cerilla,commander sa Villanueva Police Station nga gidakop nila ang mga suspek subay sa reklamo sa usa ka kagawad diin ilang nakuhaan sa mga dala nga armas.
Miingon si Cerilla nga nang-harras sa political supporters sa usa ka kandidato pagka-gobernador ang mga suspek hinungdang paspas kini gitaho ngadto kanila sa nagpakabana nga mga residente.
Gawas sa kasong pagpanulis,mag-atubang usab sa pagsupak sa election gun ban ug grave threats ang mga dinakpan.
