Mi-apelar ang kampo sa depensa ni kanhi President Rodrigo Duterte sa Criminal Court (ICC) nga tangtangon sa prosekusyon ang duha ka mga testigo tungod kay ang ilang mga pamahayag kuno nakabase lamang sa hearsay ug impormasyon nga nakuha gikan sa media ug social media.
Gihangyo ni Defense Counsel Peter Haynes ngadto sa ICC Trial Chamber III nga kuhaon sa listahan ang mga testigong nailhang P-1334 ug P-1348, nga sumala sa depensa halos wala sa nasod atol sa panahong nasakop sa Counts 2 ug 3 sa kaso.
Gipasabot sa depensa nga walay direktang personal nga kahibalo ang duha ka testigo bahin sa mga desisyon ug operasyon sa administrasyon ni Duterte, lakip ang mga alegasyon sa killing quotas, pinansyal nga mga ganti, ug target lists nga naglangkob usab sa ngalan ni Senador Ronald “Bato” dela Rosa.
Gibutyag ni Haynes nga ang mga salaysay sa mga testigo may kalabotan sa mga insidente sa war on drugs nag gikan lamang sa mga balita ug istorya sa ubang tawo, busa kulang kuno kini sa probative value aron gamiton isip ebidensiya batok sa iyang kliyente.
Gikatakda nga moatubang si Duterte sa tulo ka kaso sa crimes against humanity sa pagsugod sa iyang pormal nga hearing ICC sa Nobyembre 30, 2026, samtang wala pa’y desisyon ang Trial Chamber III sa mosyon sa depensa.
