Nagpatigbabaw ang kahusay ug kalinaw sa Iligan City atol sa dakong kalihokan sa Traslacion sa Itom nga Nazareno sa ilang syudad. Sumala ni Iligan City Police Office Spokesperson PMAJ Zandrex Panulong sa Bombo Radyo, sama sa dakbayan sa Cagayan de Oro, malampuson usab ang pagsaulog sa maong kalihokan sa Iligan ug walay natala nga mga untoward incident. Gibutyag ni Panulong nga ang selebrasyon sa syudad gihimo sa duha ka bahin. Una ang motorcade nga gitambungan sa kapin sa 1,900 ka mga deboto, samtang ang procession sa Itom nga Nazareno nga gipahigayun sa sentro nga bahin sa syudad gitambongan sa dul-an sa 1,000 ka mga deboto. Sa kinatibuk-an, gibanabana sa kapulisan nga halos 3,000 ka mga deboto ang mitambong sa Feast of the Black Nazarene sa Iligan City.
