CAGAYAN DE ORO CITY-Giyam-iran lamang sa Philippine Drug Enforcement Agency (PDEA)-10 ang akusasyon sa nadakpang Punong Brgy nga si Honiforte Redondo nga planted evidence ang nakuha nga 20 gramos nga shabu sulod sa iyang pinuy-anan sa Poblacion, Lagonglong, Misamis Oriental.
Si PDEA agent Ben Calibre miingon nga usa sa ilang pamaagi aron malikayan ang maong akusasyon pinaagi sa pag-imbitar og sakop sa media nga mosaksi sa ilang operasyon.
Siya miingon nga dili na kinahanglang plantingan og ebidensya si Redondo tungod kay ilado sila sa ilang lugar nga tigpayuhot sa illegal drugs.
Gikabutyag nga milungtad sa tulo ka bulan ang gihimong monitoring ug surveillance sa PDEA ayha nadakpan si Redondo sa panimalay niini.
Sumala pa ni Calibre nga dul-ag usa katuig na ang nakalabay sukad sila makadawat report nga nagpadayon sa iyang ilegal nga binuhatan ang opisyal taliwala paman nga usa siya sa drug surrenderee.
Si Redondo ang gikonsiderar nga high value target diin anaa sa listahan ni Pres Rodrigo Duterte.
Samtang gitin-aw sa DILG-Misamis Oriental nga magpabilin gihapon nga Punong Barangay sa Banglay si Redondo taliwala paman nga nadakpan siya tungod sa illegal nga droga.
Matud ni DILG Provincial Dir Edward Bagwani nga magpabilin sa iyang posisyon si Redondo samtang gidungog ang kasong pagsupak sa Dangerous Drugs Act of 2002 nga iyang giatubang.
Malangkat lamang siya sa pwesto kun ugaling mahimo siyang guilty sa criminal case.
