CAGAYAN DE ORO CITY – Itugyan sa dili madugay sa PNP-CIDG District Special Operations Unit sa mga ka korte sa Cagayan de Oro City ug Zamboanga City ang negosyante nga kanhi nag-promotar sa cryptocurrency nga ‘Ploutos Coin’ sa katawhan sa milabay’ng katuigan sa pipila ka bahin sa Mindanao.
Kini human nasignit sa kapolisan ang gi-tratar sa DILG nga ‘national – level most wanted person’ nga si Mark Steven Freeman,37 anyos sa S.Maison Mall sa Brgy 76, Zone 10, Pasay City pinasikad sa arrest warrant sa korte niadtong Martes sa hapon.
Gidakop si Freeman sa tungod sa mga kasong syndicated estafa ug kasupakan sa Securities Regulation Code ingon man large scale swindling.
Sumala sa rekord sa kapolisan,anaa sa 19 ka arrest warrants ang gilugwa sa nagkadaiyang korte sa syudad ug Zamboanga batok akusado nga apil sa naglangkob sa Freedom Traders Club.
Dumduman nga daghang giingong investors sa maong investment scheme ang nagpasaka’g kaso batok kaniya kay wala natuman ang pagbalik sa ilang gusto bawion nga investments.
Kini ang rason nga midangop sila sa Securities and Exchange Commission diin gi-aksyunan sa kagamhanan.
Hisayrang unang namugos si Freeman kaniadto sa interbyu sa media nga dili pagpangilad ang iyang gihimo apan lehitimo sila nga investment scheme.
