CAGAYAN DE ORO CITY, Philippines – Tumang pagsubo ug kalagot ang nagsagol nga pagbati ni Israeli Prime Minister Benjamin Netanyahu human gipangpatay sa Hamas Militants unom ka mga hostage nga duol na unta nilang maluwas kagahapong adlawa.
Sa pag-atubang sa publiko, emosyonal nga gibalita ni Israeli Defense Force Spokesperson Rear Admiral Daniel Hagari nga patay na sila Israeli-American Hersh Goldberg-Polin, Eden Yerushalmi, Carmel Gat, Almog Sarusi, Alex Lobanov ug Ori Danino, pipila ka oras dihang gilusad sa IDF ang pag-rescue kanila sa natumbok nga Hamas tunnel sa Gaza.
Base sa report, niadto pang Oktobre 7 nabihag ang unom human gi-atake sa militante ang Nova music festival sa milabay’ng tuig.
Tungod sa hitabo milusad sa lapad nga lihok protesta ang mga pamilya nga mibatig kabalaka sa ilang mga kabanay nga padayong gihostage sa Hamas.
Bana-bana sa IDF anaa pa sa kapin gatus ang gibihag sa militante nga gitago sa lawom nga mga tunnels sa Gaza.
