CAGAYAN DE ORO CITY – Napasaka na sa pamilyang Dormotorio ug kapolisan ang tulo ka kasong kriminal batok sa pito ka kadete sa Philippine Military Academy o PMA sa piskalya sa Baguio City.
Kini human akusahi ang maong mga kadete nga mikulata patay kang Cadet 4th Class Darwin Dormitorio sa daghang higayon sulod sa PMA.
Miingon ang igsoon ni Darwin nga si Dexter Dormitorio nga kabahin sa gipasaka nga kaso ang violation sa anti-hazing law,anti-torture act ug murder.
Kabahin sa gikasuhan sila si Cadet 1st Class Axl Rey Sanopao, Cadet 2nd Class Christian Zacarias,Cadet 3rd Class Felix Lumbag Jr, Cadets 3rd Class Shalimar Imperial,Cadet 3rd Class John Vincent Manalo,Cadet 3rd Class Rey David John Volante ug Cadet 3rd Class Julius Carlo Tadena.
Dugang ni Dormitorio nga mibati sila’g gamay’ng kahupay sa pamilya tungod sa hingpit pagkaso sa kapolisan batok sa maong mga kadete.
Samtang dili maka-eskapo ang duha ka tacticall officers ug tulo ka medical doctors sa PMA tungod sa kamatayon ni Cadet 4th Class Darwin Dormitorio.
Gibutyag ni Atty Jose Adrian Bonifacio,usa sa mga abogado sa mga Dormitorio nga gikasuhan usab nila dereliction of duty sila si Army Maj Rex Bolo,Capt Jeffrey Batistiana,Capt Flor Apple Apostol,Capt Maria Ofelia Beloy ug Lt Col Cesar Candeleria.
Namahayag si Bonifacio nga tungod sa ilang pagpasagad,wala mapugngi ang kanunay pagkulata sa PMA upperclass men ngadto kang Dormitorio hinungdan sa kamatayon niini.
