GIPAHIMANGNO sa Philippine Movement for Climate Justice Iligan, Lanao del Norte nga dili angay kompyansahan ang epekto sa mga bagyo human sa rapid needs assessment nga gihimo sa mga apektadong lugar sa Iligan City sa paglabay sa Bagyong Basyang.
Namahayag sa Bombo Radyo si Tresito Fiel sa maong grupo nga nakasinati og bug-at nga traffic sa barangay Tubod, Iligan City, tungod sa padayon nga clearing operations sa mga dalan ug tulay nga napuno sa baga nga lapok nga dala sa bagyo.
Matod pa ni Fiel, bisan pa og naanad na ang Pilipinas sa bagyo ug pagbaha, dili kini angay balewalain tungod kay daghang kinabuhi na ang nakalas sa milabay nga mga katuigan.
Gipunting usab niya nga bisan hinay ang bagyo, muresulta gihapon kini og grabeng pagbaha.Dugang pa ni Fiel, bisan wala ma-report ang pipila ka illegal mining operations sa kabukiran, ang kahimtang sa kinaiyahan maoy nagpadayag sa tinuod nga sitwasyon nga naabusaran ug naupaw na tungod sa dugayng pag-abuso. (James Oliver)
