CAGAYAN DE ORO CITY – Paninglon sa Kadamay-Northern Mindanao ang mga saad ni Pres Rodrigo Duterte nga wala pa mahatagi’g katumanan sa iyang ika-upat nga State of the Nation Address o SONA ning adlawa.
Si Kadamay-Northern Mindanao Secretary General Francisco Pagayaman miingon nga mohimo sila’g mass rally sulod sa usa ka adlaw sa Misamis Oriental ug Bukidnon.
Siya miingon nga wala sila malipay sa gihimong pagdominar sa China sa Pilipinas, mangayo sila’g dugang panginabuhian kang Duterte ug ilang paninglon ang mga saad niini nga wala pa mahatagi’g katumanan dihang nagpapili pa kini pagka-presidente sa nasud.
Samtang naglaum ang Iglesia Filipina Independiente o IFI nga adunay kausaban sa mga pahayag nga luwatan ni Pres Rodrigo Duterte sa iyang ikaupat nga SONA ugmang adlawa.
Miingon si IFI Bishop Felixberto Calang nga ilang gihagit si Duterte nga sa ika-upat nga SONA niini, makakita siya’g paagi nga mapatuman ang war on drugs nga walay makalas nga kinabuhi.
Dugang ni Calang nga ang ikaupat nga SONA ni Duterte ang higayon nga malimpyohan ang mga suliran sa nasud.
Samtang andam na ang seguridad nga ihatag sa Police Regional Office o PRO-10 sa mga lihok-protesta nga ilusad sa mga progresibong pundok sa SONA ni Pres Rodrigo Duterte.
Miingon si PRO-10 spokesperson Police Lt Col Mardi Hortillosa nga ilang ikapasalig ang kaluwasan sa mga mohimo’g protesta sa nagkadaiyang bahin sa rehiyon-10.
Una nang gibutyag ni Kadamay-Northern Mindanao secretary general Francisco Pagayaman nga moabot sa 200 ka protesters ang mag-protesta sa Misamis Oriental samtang 500 sa probinsiya sa Bukidnon.
