CAGAYAN DE ORO CITY-Naglusad sa kaugalingong imbestigasyon ang lokal nga kagamhanan kalabot na sa gihimong pagpanakit sa usa ka pulis sa mga dinakpang nakasupak sa curfew hours sa syudad sa Iligan.
Kini human nag-trending sa social media ang video diin nakita ang usa ka pulis nga mipaluhod, nangasaba ug namunal sa mga piniriso.
Matud ni City Information Officer Joe Pantoja nga giangkon mismo sa pulis ang iyang gihimong pagpanakit sa mga dinakpan tungod kay nadala lamang siya sa iyang emosyon.
Sa pagkakaron, gisalig na lamang sa LGU sa PNP-10 ang pag-imbestigar ug pagpahamtang silot sa maong pulis.
Gihangyo usab ni Pantoja ang kapolisan nga sundon ang gabayan nga nalatid sa ordinansa kalabot na sa curfew hours.
Kini aron dili na subling masayop ang mga pulis sa pagpitol sa mga makasupak sa niini.
Si Pantoja miingon nga hugot ang direktiba ni City Mayor Celso Regencia nga igo lamang dakpon, prisohon, magbayad sa P300 nga multa ug ipaubos sa tulo hangtud upat ka oras nga community service ang mga madakapan nga mosupak sa curfew hours.
Samtang gipanghimakak sa PNP-1O ang report nga mga menor de edad ang mga nadakpan nga nakasupak sa curfew hours sa maong syudad.
Si PNP-10 spokesperson Supt Surki Serenias miingon nga walay menor de edad nga nadakpan ang mga pulis nga nakasupak sa curfew hours inay pulos nagpangidad sa 18-anyos pataas ang mga gipaluhod ug gipangbunalan sa usa ka pulis.
Gitin-aw usab niini nga usa lang ka pulis ang mihimo’g pagpangabuso sa mga dinakpan kinsa gipaubos karon sa imbestigasyon.
Hisayran nga gi-relieve sa pwesto ang hepe sa Police Station 4-Iligan tungod sa maong kontrobersya.
