CAGAYAN DE ORO CITY-Gikalipay ni PNP regional director C/Supt Timoteo Pacleb nga milampos ang ilang tropa kuyog ang militar sa pagsikop sa kapikas ni late Malaysian bomber Zulkifli Binhir alyas Marwan sa Lanao del Norte kagahapong adlawa.
Miingon si Pacleb nga tungod sa pagkasikop ni Joromee Dungon ug ubang mga kauban niini, mapiangan ang kalihukan sa mga terorista sa Mindanao diin nagdawat suporta gikan sa gawas sa nasud.
Si Marwan maoy gitudlo usab nga prime suspect sa pagbomba sa usa ka hotel ning syudad diin duha ka tawo ang namatay tuig 2012.
Dugtong niini, ipaubos sa inquest proceeding ang nadakpan nga si Dungon, igsoon niini nga si Lorrie Atta alyas Amihan, Bebeth Dongon ug bana niini nga si SPO4 Andy Atta; amahan ni Joromee nga si Romeo Dongon ug usa pa ka igsoon niini nga si Norien Santos.
Una nang gibutyag ni Gonda nga nadakpan ang mga suspek sa gipahigayon nga raid tungod sa pagsupak sa RA act 10591 o Comprehensive Gun Control law.
Nakuha sa mga otoridad ang nagkadaiyang klase sa armas, granada, blasting cap, bala ug cellphone.
Samtang dako’g tabang sa anti-terror campaign sa gobyerno ang pagka-aresto sa biyuda ni Marwan ug sa laing upat pa sa Lanao del Norte.
Matud ni PNP spokesperson C/Supt. John Bulalacao nga ang pagkasikop kang Juromee Dungon nagpamatood lamang nga hugot ang kampaniya sa PNP batok sa terorismo.
Asoy pa niini nga mahinungdanon usab ang mahimong pahayag ug impormasyon nga ihatag ni Juromee sa otoridad ilabina sa posibilidad nga may lain pang maaresto sa mga mosunod nga adlaw.
Kahinumduman nga napatay si Marwan atol sa operasyon sa PNP SAF sa Mamasapano, Maguindanao niadtong Enero 2015.
