CAGAYAN DE ORO CITY-Gipangandaman sa PNP-10 ang posibilidad nga spill over sa nahitabong pagpamomba nga gikamatay sa 11 ka tawo sa Lamitan City, Basilan.
Si PNP-10 spokesperson Supt Surkie Serenias miingon nga gipatuman karon sa ilang tropa ang “border control” sa rehiyon nga nahimutang sa Bukidnon, Iligan, Lanao del Norte ug Misamis Oriental.
Tumong niini nga dili makasulod ang mga terorista.
Gihangyo usab ni Serenias ang publiko nga dili magpanic sa nahitabong pagpamomba.
Siya miingon nga walay nadawatang hulga ang rehiyon may kalabutan sa pagpamomba hinungdan nga walay angayang kabalak-an.
Apan, giangkon niini nga tungod sa nahitabo sa Basilan ilang gipahugtan ang seguridad aron dili masabotahe sa mga terorista ang tibook rehiyon -10.
Samtang moggamit sa bag-ong estratehiya ang Cagayan de Oro City Police Office o COCPO sa pagbantay sa seguridad sa dakbayan batok sa mga terorista.
Sumala ni CoCPO spokesperson Supt Mardi Hortillosa nga kulang ang populasyon sa mga pulis sa syudad hinungdan nga nangita’g pamaagi si City Director Sr/Supt Nelson Aganon nga mabantayan ang dakbayan batok sa mga pagpanghulga sama sa nahitabong pagpamomba sa Basilan.
Gikompirmar ni Hortillosa nga molungtad na sa 12 oras ang duty sa matag pulis nga sakop sa syudad.
Kini tungod sa kakulangon sa ihap sa mga pulis ingon man kinahanglang nakaalerto usab sila batok sa kriminalidad ilabina nga saulogon sa dakbayan ang kapistahan ni Sr San Agustin.
Gani, gihangyo ni Hortillosa ang kooperasyon sa matag residente ngadto na sa mga pulis aron malikayan ang mga pagpanabotahe.
Sayran nga una ng naghatag kamanduan si Mayor Oscar Moreno sa kapulisan sa pagtuman sa checkpoints aron masiguro ang seguridad sa katawhan dinhi sa dakbayan.
Gani gihangyo usab sa mayor ang katawhan nga motabang ug mokooperar sa mga pulis.
