CAGAYAN DE ORO CITY-Giisa karon sa PNP-10 ang alerto sa mga lugar nga sakop sa Amihang Mindanao.
Kini human masikop ang tulo ka Maranao-Muslim diin nakuhaa’g electronic devices,granada ug .45 caliber pistol sa magkalahi nga hotel nga naka-check-in sila sa Cagayan de Oro City.
Matud sa Bombo Radyo ni PNP regional spokesperson Supt Lemuel Gonda nga padayon ang ilang validation sa intelligence community kabahin sa background sa mga suspek nga sila si Oding Alamada;Sidic Casubedan ug Sainoden Bitiara kon sila konektado ba sa teroristang Maute.
Gibutyag ni Gonda nga gipadumduman sila ni PNP regional director C/Supt Atty Agripino Javier nga dili mohatag paghugak sa mga ipatuman nga target hardening measures aron dili malutsan sa mga terorista.
Dumduman nga dili lamang lambigit sa kalihukang terorismo ang Maute apan gisudlan usab nila ang pagpangilkil ug pagpangpusil-patay bugti sa dakong salapi aron gamitonn paggasto sa ilang kontra-gobyerno nga kalihukan.
Sila si Bitiara,Alamada ug Casubedan ang gipakasuhan sa illegal possession of explosive,illegal possession of firearms ug pagsupak sa Dangerous Drugs Act of 2002 tungod usab sa nakuhaa nga sachets sa suspected shabu.
