CAGAYAN DE ORO CITY-Gitin-aw sa Police Regional Office (PRO-10) nga ila gihapon ipaubos sa validation kun ugaling adunay pulis sa rehiyon ang nalambigit sa illegal nga droga base sa listahan ni Pres Rodrigo Duterte.
Gihimo kini nga kumpirmasyon ni PRO-10 spokesperson Supt Surki Serenias human laing pulis sa kaulohan ang ginganlan ni Pres Duterte nga nalambigit sa druga.
Si Serenias miingon nga bisan paman gipaubos na sa validation sa daghang mga law enforcement agencies ang mga pangalan nga anaa sa listahan ni Pres Duterte, gikinahanglan gihapon silang magpahigayon sa imbestigasyon ayha tanggalon sa serbisyo ang mga nalambigit nga pulis.
Samtang, giklaro ni Serenias nga walay mahimo si PRO-10 Reg Dir PCSupt Timoteo Pacleb kun ugaling adunay mga pulis sa rehiyon ang anaa sa listahan nga nalambigit sa druga.
Siya miingon nga walay kapas si Gen Pacleb nga duphan ang maong mga pulis.
Gikinahanglan matud pa nga imbestigahan ang maong mga pulis aron mahibal-an ang kamatooran kun ugaling nalambigit kini sa illegal nga droga.
Dugang pa niini nga gikinahanglan gihapon sundon sa ilang organisasyon ang due process.
