CAGAYAN DE ORO CITY- Mismo si PNP chief deputy director for operations head C/Supt Camilo Pancratius Cascolan ang mosul-ob sa mga medalya sa awardees nga police station commanders ug individual members diha sa Camp Alagar ning syudad karong buntag.
Kini alayon sa ikaduhang hugna sa paghatag pasidungog ni PNP regional director C/Supt Agripino Javier sa mga pulis nga adunay outstanding performance batok sa pagsumpo sa mikuyanap nga illegal drugs sa rehiyon.
Si PNP regional spokesperson Supt Lemuel Gonda miingon nga kapolisan lamang sa Camiguin ang walay madawat nga pasidungog nunot sa double barrel alpha reloaded ning adlawa.
Nasuta nga sa maong awardees,11 ka police commanders ang gikan sa Cagayan de Oro City Police Office,tag-tulo sa Misamis Oriental,Bukidnon,Iligan City samtang tag-duha sa Lanao del Norte ingon man Misamis Occidental.
Ang paghatag pasidungog sa mga kugihan nga kapolisan ang kaugalingong inisyatiba ni Javier diin unang gitambungan ni PNP chief deputy director for administration C/Supt Ramon Apolinario ug karong adlaw si Cascolan.
