CAGAYAN DE ORO CITY-Gikompirmar ni PNP regional spokesperson Supt Lemuel Gonda nga walay mga dagkong hitabo nga nakabalda sa katawhan sa ilang pagbisita sa nagkadaiyang sam-ang sa rehiyon.
Kini human unang gimando ni PNP regional director C/Supt Timoteo Pacleb nga dili mo-kumpiyansa paghatag
seguridad sa publiko batok sa bisan unsa nga hadla sa kinabuhi.
Giawhag ni Gonda ang katawhan nga ipadayon ang ilang kooperasyon sa kapolisan ug militar sa nagkadaiyang lalawigan aron makab-ot usab ang kalampusan ning adlaw sa mga kalag.
Samtang mikunhod ang ihap sa mga kontrabando nga nakompiskar sa kapulisan sa nagkadaiyang sam-ang ning dakbayan sukad kagahapong adlawa.
Gikompirmar ni Cagayan de Oro City Police Office spokesperson C/Insp Mardy Hortillosa nga mas ubos ang ihap sa mga miduaw nakalapas sa nag-unang panawagan sa kapolisan.
Hinoon,sa city memorial park sa Brgy Camaman-an anaa lamang sa 10 ka kontrabando ang nabawi samtang may tulo lamang gikan usab sa Greenhills Memorial Park sa Brgy Bulua sa syudad.
Sa pikas bahin,giisa sa militar ang ilang alerto sa mga tumbok nga lugar diin naglihok ang mga rebeldeng New People’s Army o NPA ilabina sa Northern Mindanao ug Caraga region.
Kini bisan nga gikompirmar ni 4th ID spokesperson Capt Joe Patrick Martinez nga wala makapanghasi ang mga NPA ug ubang armadong pundok sa pagdumdom sa adlaw sa mga santos kagahapon.
Hinoon,wala sila’ kumpiyansa ilabina nga may engkuwentro tali sa 1st ID,Philippine Army ug NPA sa Tangub City nga ubos sa AFP Western Mindanao Command sa miaging adlaw.
