CAGAYAN DE ORO CITY- Gipamugos sa PNP-10 nga mi-una’g rekisa ug tira sa armas ang kapin dose ka suspek sa pagpanulis didto sa Brgy Cavinte,Ozamiz City,Misamis Occidental.
Kini ang hinungdan nga napatay sa mga otoridad ang siyam ka suspek nga misukol atol sa pagsikop kanila.
Gibutyag ni PNP regional spokesperson Supt Lemuel Gonda, nga wala pa sila’y mahatag nga impormasyon kon unsa ang pangalan sa grupo sa mga suspek diin may usa ka pulis ang nadakpan.
Gipasalig ni Gonda nga hatagan sa due process ang tanang dinakpan gawas pa sa napatay atol sa nahitabong exchange of fire tali na sa mga mi-responde nga kapolisan gikan sa Ozamiz City Police Station ug Tangub Police Station sa miaging adlaw.
Una niini, lakip sa napatay sa englwento sila Alfie Mahusay;Anjun Simene;Lito Manisan;Romeo Libaton;Jerry Manzano;Joel Mira;Franciso Manzano ug Consorcio Rubio Sr.
Nasikop usab sa kapolisan sila si Carmelita Manzano;Luareta Ugmad;Janice Manzano;Monaliza Ugmad;Jonner Libatog ug PO2 Diosdado Hinoctan nga nadestino sa Tangub City Police Station.
