CAGAYAN DE ORO CITY-Giangkon ni PNP regional spokesperson Supt Lemuel Gonda nga natawag sa Camp Crame ang ilang atensyon kon nganong nakagawas ug nagkatag sa social media ang confidential memorandum gikan sa intelligence division.
Kini naghatag alarma sa publiko ang unod sa memorandum kabahin sa giingong presensiya sa ISIS bombers nga mohimo’g kasamok sa mga syudad sa Mindanao.
Miingon si Gonda kini ang rason nga dunay gihimo nga internal investigation sa PNP-10 kon nganong migawas ang maong dokumento sa publiko.
Hinoon,gihupay ni Gonda ang kabalaka sa katawhan human nasuta usab sa intelligence community nga negatibo ang presensiya sa ISIS bombers partikular dinhi sa rehiyon 10.
Dumduman nga namugos si Gonda nga gi-peke ang pirma sa ilang intelligence officer aron ipatoo nga lehitimo ang memorandum nga mihungaw ug napaingon sa social media.
Una niini, mismo si National Capital Region kon NCRPO Director C/Supt Oscar Albayalde ang nagkompimar nga daghang lugar sa kauluhan ang ubos sa monitoring diin makita ang giingong suspecte presence sa mga terorista gikan sa Mindanao.
