CAGAYAN DE ORO CITY-Nagpahimangno si civic military officer ug tigpamaba sa 8th IB,Philippine Army 1Lt. Erwin Bugarin sa publiko nga bantayan ang himoon nga pagpangilkil sa mga rebeldeng New People’s Army.
Matud ni Bugarin nga mao kini ang panahon nga himoon sa mga walhong grupo ang pagpangilkil tungod kay nagkadool na ang ilang anibersaryo.
Asoy pa niini nga maoy sagad nga target sa pagpangilkil sa mga rebelde ang mga establishimento,mga kompaniya ug mga yanong katawhan sa kabukiran pinaagi sa pagpangayo’g mga pagkaon.
Tungud niini, nangayo ug supporta ang tigpamaba sa 8th IB sa kooperasyon sa publiko aron mapakigbatukan ang pagpangatake sa mga rebeldeng NPA sa mga sundalo ug pulis.
Si Bugarin miingon nga gikinahanglan nila ang tabang sa mga residente sa matag lugar aron mapugngan ang liniog nga binuhatan sa mga armado.
Una nang giangkon ni Bugarin nga dili tanang kalihukan sa mga NPA ang ilang ma-monitor tungod kay limitado lamang ang ilang pwersa.
