CAGAYAN DE ORO CITY-Gisaway sa PNP-10 ang pasiatab sa Komunistang Partido sa Pilipinas nga gidapigan niini ang paghatag proteksyon sa katawhan batok sa bisan unsa nga abuso gikan sa gobierno.
Kini human unang gipasigarbo sa maong grupo nga misamot kalig-on ang ilang puwersa tungod sa suporta sa masa sa kabukiran batok sa kagamhanan.
Gihimo ni PNP regional spokesperson Supt Lemuel Gonda ang pahayag atol sa ika-49 ka tuig nga anibersaryo sa CPP kagahapong adlawa.
Miingon si Gonda nga gi-monitor nila ang mga kalihukan sa CPP apan ilang nasayran nga wala kini naghimo’g pag-atake sa gobierno sa rehiyon kagahapon.
Una nang gipamugos sa CPP nga sulod ning tuiga, napatay nila ang kapin 100 ka tropa sa gobierno samtang anaa lamang sa 12 sa ilang mga sakop ang daw nagbuhis usab sa mga kinabuhi niini.
