CAGAYAN DE ORO CITY – Gipasalig sa Police Regional Office 10 nga mahatagan sa igong seguridad ang pagpahigayon sa usa ka adlaw nga pagpili sa katawhan sa mga kandidato sa May 9 elections sa Northern Mindanao.
Kini isip kamanduan ni Pres Rodrigo Duterte ngadto sa PNP ug AFP nga gitahasan nga mobantay sa proseso sa piliay nga dumalahon sa mga magtutudlo sunod semana.
Gibutyag ni PRO 10 spokesperson Lt Col Michelle Olaivar nga naplastar na ang tanang tropa ilabina sa mga lugar nga ubos sa kontrol sa Commission on Elections sama sa Misamis Occidental.
Siya namahayag nga kabahin sa ilang gitutukan ang mga posibleng dayag nga ‘vote buying’ sa mga kandidato ngadto sa mga botante nga mobaligya sa ilang mga boto.
Samtang nakaandam na ang halos 300 ka pulis nga gituyo’g padala sa Police Regional Office 10 aron mohatag seguridad sa mga magtutudlo ingon man mga botante sa lalawigan sa Misamis Occidental.
Kini human dunay natala nga mga kamatay ug pagsulay pagpatay sa mga kandidato sa maong probinsya hinungdang gipaubos sa kontrol sa Comelec.
Gibutyag ni PRO 10 spokesperson Lt Col Michelle Olaivar nga subay sa pinal nila nga command security briefing,dugang gatos ka pulis ang gipangayo ni Misamis Occidental PNP Director Col Antonio Placido aron masiguro nga dili makapanghasi ang pipila ka political supporters nga sinugo sa mga dagkong politiko sa maong lugar sa besperas ug mismong adlaw sa piliay.
Dugtong usab niini,naka-alerto usab ang National Intelligene Coordinating Agency o NICA 10 batok sa mga impormasyon nga nagtumong sa posibleng mga sabotahe gikan sa mga pundok nga kontra sa gobierno sama sa mga terorista ug CPP-NPA dinhi sa rehiyon.
Gibutyag ni NICA-10 Director Manny Orduña nga tuyo niini nga dili matugaw ang May 9 elections nga unang gimando ni Duterte nga kinahangang magmalampuson ug walay matigayong dayag nga pagpanikas sa resulta sa piliay.
Miingon si Orduña nga hinoon,wala sila’y na-intercept nga bisan unsa nga impormasyon nga dunay dagkong hadla nga gubuton ang proseso sa eleksyon sa Northern Mindanao sunod semana.
