CAGAYAN DE ORO CITY-Pugngan sa kapolisan ang mga posibleng pag-atake nga himoon sa CPP-NPA ngadto sa govt vital installations nga nakabase sa rehiyon.
Kini human natunong ang ika-49 ka tuig nga anibersaryo sa NPA sa Huwebes Santo diin gidahom sa gobierno ang himoong mga pagpanghasi ngadto sa mga sibilyan.
Miingon si PNP regional spokesperson Supt Lemuel Gonda nga anaa ang ilang koordinasyon sa militar aron sumpu-on ang bisan unsa nga sabotahe sa seguridad sa mga rebelde ilabina sa mga kabaryuhan ning semanaha.
Sa miaging semana,300 ka residente ang nagbakwit tungod sa engkuwentro sa militar ug NPA rebels sa Aloran,Misamis Occidental.
Samtang gikompirmar sa 4th ID,Philippine Army nga may nakaplano nga mga pag-atake ang CPP-NPA batok sa tropa sa gobierno.
Kini ang hinungdan nga padayon ang operasyon sa mga sundalo sa mga lugar diin naglihok ang mga rebelde aron di mahasi ang pagbalaan ning semanaha.
Miingon si 4th ID spokesperson 1Lt Tere Ingente nga himoon kini sa mga rebelde aron ipatoo nga lig-on pa ang puwersa sa mga komunista diha sa kabaryuhan.
Una niini,wala motoo ang liderato sa AFP sa ‘holy week ceasefire’ nga gisulti sa CPP-NPA nga nakabase sa Caraga Region.
