CAGAYAN DE ORO CITY – Nakab-ot sa kapolisan ang sobra kahapsay nga pag-obserbar sa adlaw sa mga santos nga tinguha usab nila mahuptan sa katumanan sa selebrasyon sa pagdumdom sa mga kalag sa rehiyon ning adlawa.
Kini human walay natala nga bisan unsa nga dugu-ong hitabo nga dunay kalambigitan sa maong kalihukan sukad pa kagahapong adlawa.
Miingon si Police Regional Office-10 spokesperson Lt Col Mardi Hortillosa nga makatutok pa gihapon ang ilang puwersa kauban ang militar sa kapi’g 200 ka menteryo hangtod ugmang adlawa.
Gani,may mga gipadala nga inspection teams si PRO-10 regional director Brig Gen Rolando Anduyan sa lain-laing probinsya pagsiguro nga masunod ang security implementation sa Oplan Undas 2019.
Samtang gipadumduman ni City Mayor Oscar Moreno ang publiko nga magmatngon sa kanunay ilabina kon anaa sulod sa mga menteryo sa syudad ug lalawigan.
Gitumbok ni Moreno ang bahad sa seguridad nga mahimong buhaton sa pundok nga dunay dakong kasuko sa kagamhanan.
Miingon ang mayor nga kanunay ang iyang koordinasyon sa PRO-10 ug kang City Police Director Police Col Henry Dampal sa tuyo nga mapadumduman sa kanunay ang kapolisan sa seguridad nga ihatag nila sa publiko sa obserbasyon sa adlaw sa mga santos ug kalag.
