CAGAYAN DE ORO CITY- Ikatag ang mga pulis kauban ang force multipliers sa nagkadaiyang religious sites ug ubang lugar nga dagsa ang katawhan sa pagtamod sa semana santa sa Misamis Oriental.
Kini human gipasalig sa Misamis Oriental Provincial Police Office nga all set na sila kauban ang militar paghatag sa seguridad sa mga tawo nga mohimo’g pag-penetensiya sunod semana sa lalawigan.
Miingon si Police Lt Princess Joy Enriquez,tigpamaba sa Misamis Oriental PNP nga kabahin sa hataga’g hugot nga seguridad ang El Salvador City, Talisayan, ug Claveria,Medina ug Gingoog City diin nagbaton sa religious sites.
Gimando usab ni Police Provincial director, Police Colonel Rolando Destura nga butangan sa pulis ang mga nagkadaiyang beaches sa tibook lalawigan.
Samtang,gipahugtan sa Philippine Coastguard-Northern Mindanao ang seguridad sa mga pantalan sa pag-obserbar sa semana santa sa rehiyon.
Gibutyag ni PCG-Northern Mindanao spokesperson ensign Jherich An John Ybañez nga tuyo niini nga masiguro nga walay mabutang sa peligro nga biyahidor sa nagkalain-laing pantalan sa rehiyon.
Miingon si Ybañez nga ila nang gilusad ang Oplan Biyaheng Ligtas ilabina nga nadungan sa taas nga bakasyon ang Semana Santa.
Gibutyag usab niini nga adunay regulat nga magpatrolya sa mga kadagatan nga gabisitahon sa mga turista.
Tungod niini, kanselado una ang tanang bakasyon sa ilang mga personahe.
