Gipasalig sa Philippine National Police (PNP) nga andam na kini sa pagpatuman sa mga gikinahanglang lakang sa seguridad alang sa ika-49 nga ASEAN Summit and Related Summits nga ipahigayon sa Metro Manila gikan Nobyembre 16 hangtud 18, 2026.
Matud ni PNP Chief Police General Jose Melencio Nartatez Jr., naglakip sa ilang mga pagpangandam ang pagsiguro sa kaluwasan sa mga bisitang opisyal sa lainlaing nasud, mga delegado ug mga dapit diin ipahigayon ang maong kalihokan.
Gipasalig usab niya nga adunay igong mga personahe, kahinguhaan sa logistika ug pondo ang PNP, samtang hugot nga makig-alayon kini sa ubang ahensya sa kagamhanan ug sa mga lokal nga pangagamhanan aron masiguro ang kalinaw ug kahapsay sa maong kalihukan.
Dugtong niini, gipahayag usab ni Nartatez nga gamiton sa PNP ang tanang magamit nga kapanguhaan ug magdeklara sa angay nga lebel sa alerto depende sa ilang pagtimbang-timbang sa kahimtang sa seguridad, diin sa pagkakaron ubos pa ang lebel sa hulga nga ilang nabantayan. (raniel mahunyag)
