CAGAYAN DE ORO CITY – Gihulatan pa sa Valencia City Police Station ang mga lumad leader ug grupong Bayan Muna nga mokoordinar kanila sa ilang gihimong imbestigasyon sa pagpatay kang mass rally organizer Leah Tumbalang, 46 anyos, ug molopyo sa Sitio Office San Fernando,Bukidnon.
Gibutyag ni Valencia City Police Office commander Police Lt. Col. Surki Serenias nga sa dili madugay posibleng may matudlo na nga person of interest ang maong kaso.
Dead on the spot si Tumbalang human pusila sa ulo usa ka riding in tandem sa Valencia City Bukidnon kagahapong adlawa.
Base sa nakasaksi,nakamaskara ang mga suspek sa pagpatay sa Bayan Muna rally organizer.
Narekober sa crime scene ang slugs sa kalibre 45 nga armas.
Samtang gitumbok sa grupong KASILO Organization ug Bayan Muna nga posibleng mga sundalo sa 88 IB ang mipatay sa lumad leader nga si Tumbalang.
Gipamugos kini ni Wilboy Lam-uy, spokesperson sa mga grupo sa KASILO sa Bukidnon.
Miingon si Lam-uy nga imposibleng mga sakop sa New Peoples Army ang mipatay kang Tumbalang tungod kay kung sila makapatay,mu-angkon man kini.
Wala usab sila nagduha duha pagtudlo sa mga sundalo nga suspek sa krimen tungod kay giila man nila ang mga sundalo nga kusog muharas sa mga lumad.
Midepensa usab si Lam-uy sa kampo sa mga NPA nga sukad sa ilang pagpuyo sa syudad, wala silay nakitang rebelde nga nagsinamok sa ilang mga luna.
