CAGAYAN DE ORO CITY – Gipaubos sa imbestigasyon sa Police Regional Office 10 si Bukidnon Provincial Police Office Director Police Col. Reynante Reyes kinsa nabutang sa ‘hot seat.’
Kini human nakaabot sa atensyon ni PNP chief Gen Rodolfo Azurin Jr ang sulat sa pipila ka gitoohang mga pulis nga gipadala kang Pres Bongbong Marcos pinaagi sa hotline nga 8 8 8 8 batok sa alegasyon sa kurapsyon nga giatubang ni Reyes.
Miingon si PRO 10 regional director Brig Gen Lawrence Coop nga tipik sa nalatid sa reklamo ang giingong pagdawat ni Reyes sa 15-mil pesos kada-bulan gikan sa 30 hangtod 40 ka pulis nga ubos sa ‘Pabuhi o Alive’ scheme.
Nalatid usab sa sulat-reklamo nga dunay pipila ka pulis nga atua sa abroad,nag-negosyo ug nahimong security escorts sa dagkong mga negosyante apan kanunay’ng present attendance kon may himoon na nga headcount sa mga personahe sa Bukidnon PNP.
Gawas niini,giakusahan usab si Reyes nga nalambigit sa illegal nga mga pasugal sa probinsya.
Dugtong niini,gibutyag ni Coop nga dili niya tugtan nga mao kini ang mahitabo sa ilang mga pulis hinungdang may gilusad nga imbestigasyon batok sa mga nalambigit sa maong mga akusasyon.
Samtang gihulat usab nga mohatag sa katin-awan si Reyes batok sa tanang pasangil nga iyang giatubang.
