CAGAYAN DE ORO CITY – Naka-full alert status ang kapolisan kaabag ang militar sa pagbantay sa seguridad alayon sa adlaw sa mga santos ug kalag.
Kini tungod sa libuang katawhan nga midagsa sa nagkadaiyang mga menteryo aron duawon ang ilang namatay nang mga mahal sa kinabuhi.
Miingon si Police Regional Office -10 spokesperson Lt Col Mardi Hortillosa nga anaa sa kapi’g 200 ka menteryo ang bantayan sa 8-mil ka pulis ug wala pa’y apil niini ang mga sundalo.
Tuyo niini nga dili makakita’g higayon ang mga terorista ug ubang threat groups nga walay laing tuyo gawas sa pag-sabotahe sa kahusay’g kalinaw.
Samtang nakakatag ang mga personahe sa incident management team o IMT sa nagkadaiyang menteryo ug pampublikong lugar ning syudad.
Kini human e-mando ni City Mayor Oscar Moreno nga masiguro ang luwas ug hapsay nga pagduaw sa katawhan sa nagkadaiyang 232 ka menteryo sa dakbayan.
Miingon si CDRRMD head Nick Jabagat nga unta alerto ang publilko sa ilang mga padulngan ilabina nga libuang dumuduaw ang dagsa sa public ug private cemeteries sa syudad.
Sa pikas bahin,nakaisa ang blue alert status ang puwersa sa provincial govt alayon sa obserbasyon sa adlaw sa mga santos ug kalag sa Misamis Oriental ning adlawa.
Kini human gipasiguro usab ni Gov Bambi Emano nga dili matugaw ang katawhan samtang anaa sa paghinuklog sa ilang mga minahal sa kinabuhi sa mga menteryo.
Gibutyag ni PDRRMO head Fernando Dy Jr nga gawas sa ilang mga personahe,kuyog usab mohatag sa hugot nga seguridad ang kapolisan ug militar ilabina kon dunay manghasi nga armado sa lalawigan.
