CAGAYAN DE ORO CITY – Namugos si Misamis Oriental Police Provincial Director Col. Roy Bahian nga walay kapalpakan sa ilang pag-neutralize sa suspek nga armado sa granada nga nakasulod sa Initao College sa Initao ning lalawigan.
Kini human wala mapugni sa kapolisan nga dili makabusikad ang granada nga gidala-dala ni Ibrahim Basher nga alang unta sa pipila ka empleyado sa DENR-Initao nga gikasuk-an niini tungod sa dili pa makompirmar nga rason.
Miingon si Bahian nga lisod ang sitwasyon nga giatubang sa iyang mga pulis,ilabina nga wala na’y ‘pin’ ang gidala-dala nga granada ni Basher pagsulod sa maong tunghaan.
Gipasalig ni Bahian nga abli sila sa bisan unsa nga imbestigasyon aron mohatag katin-awan ilabina nga 17 ka tinun-an ug magtutudlo ang samaron.
Lakip usab sa mga samaron si Police Master Sgt Alice Balido nga giingong napusila’g unay sa iyang mga kauban gawas miigo nga sharpnels samtang gi-neutralize si Basher.
