CAGAYAN DE ORO CITY-Gi-angkon ni Special Investigation Task Group o SITG-Rotoras spokesperson Supt Mardi Hortillosa nga ilang gipaubos sa ‘person of interest’ ang byuda sa gipatay’ng si University of Science and Technology of Southern Philippines president Dr. Ricardo Rotoras.
Matud ni Supt Hortillosa nga ila kining gihimo base sa pahayag nga giluwatan ni Eldie Rotoras nga daghan sila’g nabantayan nga “unusual behavior” sa byuda niini nga si Zarah Lynn Rotoras sukad pa kini mamatay hangtud gihaya.
Apan, gitin-aw ni Hortillosa nga 26 ka sakop sa pamilyang Rotoras ang nag-boluntaryo nga ipaubos sa imbestigasyon aron mapadali ang pagsulbad sa kaso.
Gibutyag usab ni Hortillosa nga boluntaryong nagsumite sa iyang kaugalingon si Mrs Rotoras.
Kini nunot na sa rebelasyon nga adunay pagduda sa byudang Rotoras.
Si Hortillosa miingon nga giangkon mismo ni Zarah Lynn nga nawad-an na siya’g gana sa pagpangita’g hustisya sa kamatayon sa iyang bana ilabina nga pito kabulan na ang nakalabay ug wala pa kini masulbad.
Gani, giangkon niini nga naka-recover na siya sa kamatayon sa iyang kapikas.
