CAGAYAN DE ORO CITY – Gihimuan pa sa dugang pakisusi sa kapolisan ang kamatayon sa gitoohang police asset kinsa gipusil sa motorcycle in tandem suspects nga nahinanok sa pagkatulog daplin sa Corrales Avenue-Chavez Streets ning syudad kaganihang kadlawon.
Kini human kompirmaha ni Divisoria Police Station commander Major Byron John Ratunil nga naghupot na sila sa persons of interest nga hayan makahatag sa dinaliang sulbad sa kamatayon sa biktima nga si Boyet Ladao nga taga-Brgy Consolacion ning syudad.
Sa pasiunang pakisusi,nasuta ni Ratunil nga igo lang natulog tubag sa pipila ka ‘homeless individuals’ ang biktima dihang giduulan kini sa mga suspek ug gipusil sa makatulo ka higayon gamit ang gitoohang kalibre 9mm hinungdan sa kamatayon niini.
Siya miingon nga limitado una ang ilang mahatag nga impormasyon sanglit nagpadayon ng ilang pursuit operation batok sa mga nakasibat nga mga suspek.
Narekober sa mga personahe sa Scene of the Crime Operatives/SOCO ang tulo ka basiyo sa gitoohang bala sa 9mm pistol.
Sumala usab sa impormasyon,testigo si Ladao sa kasong pagpusil-patay usab sa laing asset diin suspek ang aktibong pulis sa Sitio Pinikitan,Brgy Camaman-an ning syudad sa miaging mga bulan.
Apan wala pa’y masulti’g dugang si Ratunil kabahin sa maong teorya kay mohimo pa kini sa background check sa kanhi mga kalihukan sa biktima sa panahon nga siya buhi pa.
Dumduman nga gawas nga nadungog nga police asset si Ladao, kanhi usab daw kini dispatcher kaniadto ning syudad.
