CAGAYAN DE ORO CITY- Gipasalig sa PNP-Regional Internal Affairs Service Northern Mindanao nga masilotan ang kapolisan kon ugaling adunay pag-abuso sa pagpatuman sa anti-illegal operations batok sa mga Parojinog sa Ozamiz City.
Kini human gihulat na ni PNP Internal Affairs Service regional director Sr Supt Gerry Galvan ang official report gikan sa raiding team nga nagsilbi sa search warrants diin nag-resulta sa kamatayon ni City Mayor Reynaldo Parojinog Sr,kapikas nga si Susan ug igsoon usab nga si board member Octavio Parojinog Jr.
Miingon si Galvan nga gilayon nila iduso ang rekomendasyon sa ilang national headquarters kon angay bang kasuhan o dili ang mga pulis sa maong operasyon kon matibawas ang ilang imbestigasyon sulod ning bulana.
Samtang gibarugan ni Ozamiz City Police Station commander C/Insp Jovie Espenido nga dili rub-out ang kamatayon sa 16 ka tawo nga naglakip kanila ni Parojinog Sr,kapikas nga si Susan ug Octavio Jr.
Kini ang tubag ni Espenido batok sa espekulasyon ni Atty Ferdinand Topacio nga abogado ni detained City Vice Mayor Nova Princess Parojinog.
Namugos si Espenido nga angay masayran ni Topacio nga nahitabo ang pagpangronda sa magkalahi nga mga pinuy-anan sa mga Parojinog sa Ozamiz City sa miaging Domingo sa kadlawon.
Una niini,gibutyag ni Topacio nga imposible nga walay namatay sa panig sa kapolisan kon ugaling tinood nga misukol ang armed group sa mga Parojinog atol sa anti-illegal drug operation.
