CAGAYAN DE ORO CITY- Gihulipan sa kapolisan sa back to back mini-concerts ang pagsaulog sa Labor Day inay batikos gikan sa mga raliyesta ang madungog sa kadalanan ning syudad ug uban bahin sa rehiyon.
Kini human wala kaporma ang mga progresibong pundok aron dumdumon ang adlaw sa mga mamumuo kinuyugan sa pagbatikos sa kapalpakan sa gobierno.
Miingon si Police Regional Office o PRO-10 spokesperson Lt Col Surkie Serenias nga bugtong ang progresibong pundok lamang gikan sa Bukidnon ang naghimo’g lihok-protesta sa Bukidnon kagahapong adlawa.
Namugos si Serenias nga dili pagyaga-yaga apan pagpasidungog unta sa mga mamumu-o ang angay magpasulabi sa Labor Day sukwahi sa sagad buhaton sa mga raliyesta sa taas na nga panahon.
Samtang gikalipay sa pipila ka grupo sa mga mamumuo ang pagsanong ni Pres Rodrigo Duterte sa ilang yangongo dugan sa celebrasyon sa Labor Day kagahapong adlawa.
Miingon si ALU-TUCP regional vice president Atty. Procolo Sarmen nga human sa ilang gihimong panawagan kagahapon mihangyo si Pres Duterte sa mga magbabalaud nga ipasar isip balaud ang Security of Tenure bill ug ang pagwagtang sa kontrakwalisasyon sa nasud.
Matud ni Sarmen nga una ng napakyas pagtuman si Duterte sa saad kaniadto ug ning higayona malaumon silang tumanon na gayud sa presidente ang saad niini.
