CAGAYAN DE ORO CITY – Giporma sa kapolisan ang task force aron mangunay pagtutok sa pagpusil-patay sa duha ka bakery workers sa lungsod sa Sagay,Camiguin.
Miingon si Camiguin Police Provincial Office spokesperson Lt Col Guillermo Hamut nga nag-unang tuyo sa task force nga paspas ang pagsulbad sa kaso ug kahatagan sa dinalian nga hustisya ang mga biktima nga sila Reynaldo Esguerra,40 anyos ug Paica Abbu,21 anyos nga taga-Brgy Manuyog sa lugar.
Gibutyag ni Hamut nga kabahin sa gitutukan sa imbestigasyon ang posibleng pagdumot sa mga suspek o nagsugo sa kremin ngadto kang Abbu.
Padulong sa trabahuan ang mga biktima sakay sa motorsiklo dihang gipahunong sila sa mga suspek ug gipang-pusil ang ulo ug ilog gamit ang kalibre 45 nga armas nga hinungdan sa ilang kamatayon.
Dugtong niini,gi-welcome usab sa PNP ang tanyag nga reward money balor P2-M sa negosyanteng si Paul Rodriguez aron mapadali ang pagsulbad sa kamatayon sa mga biktima.
Una nang midalikyat ang maong negosyante sa Camiguin PNP headquarters aron ipaabot ang maong katuyuan pagtabang pagsulbad sa kaso.
Hisayrang kini ang unang higayon nga dunay pagpamusil nga nagkutlo sa kinabuhi sa duha ka kinabuhi sa mga sibilyan.
