CAGAYAN DE ORO CITY-Gihataga’g hugot nga seguridad sa kapolisan ingon man sa militar ang kasaulugan sa mga Maranao-Muslim sa Ramadan Observance ning syudad.
Kini nunot sa pagsugod sa kasaulugan diin nagpaubos ang sumusunod sa pagtoong Islam sa pag-ampo, puasa ug ubang sakripisyo sulod sa usa ka bulan.
Miingon si Supt Mardi Hortillosa, tigpamaba sa Cagayan de Oro City Police Office o COCPO nga mismo ang station commanders ang gimanduan sa pagpahimutang sa security plan sa mga moske nga nahimutang sa tagsa-tagsa nila ka area of responsibility.
Samtang gipasalig usab sa hugpong sa mga Maranao-Muslim nga panalipdan nila ang seguridad nga gipatuman sa mga otoridad sa syudad ug silingang mga lugar dinhi sa Northern Mindanao.
Gihimo ni retired National Commission on Muslim Filipinos o NCMF regional director Atty Ombra Gandamra alayon sa pagsaulog sa Ramadan diin sila nagpaubos sa mga pag-ampo ug puasa.
Miingon si Gandamra nga obligasyon nila ang pagtabang sa kagamhanan ilabina nga daghan sila nga nanimuyo sa syudad ug Iligan City nga siligan sa Marawi City diin gisulayan pag-ilog sa mga terorista sa tuig 2017.
