CAGAYAN DE ORO CITY-Gitawag sa Cagayan de Oro City Police Office o COCPO nga ‘fake news’ ang report nga adunay mga kidnapper ang nadakpan sa kapolisan sa syudad.
Kini nunot na sa nagkatag nga report sa social media nga nag-ingon nga nasikop na sa pulis ang mga suspek sa pagpanguha’g bata sa Mindanao.
Matud ni CoCPO spokesperson Supt. Mardy Hortillosa nga walay kamatooran ang maong report ilabina nga wala kini matala sa tibook police station sa dakbayan.
Gikompirmar ni Hortillosa nga ilang gipaubos sa imbestigasyon ug balidasyon ang attempted abduction cases sa Maranao victims.
Siya miingon nga nakadawat sa report ang Police Station 1 ug Cogon Police Station kalabot na sa abduction incidents.
Laraw karon sa mga imbestigador nga imbestigaran ang mga biktima aron makuha ang kamatooran ilabina nga kulang-kulang ang detalye sa mga complainant.
