CAGAYAN DE ORO CITY – Namugos ang kapolisan nga walay foul play sa kamatayon sa bao-bao driver nga unang nadungog nga naghunos kinabuhi sulod selda sa Opol Police Station sa lungsod sa Opol,Misamis Oriental.
Kini ang gisaysay ni Opol Police Station commander Police Major Michael Lacasan subay sa resulta sa imbestigasyon sa Scene of the Crime Operatives o SOCO nga mihiling sa lawas sa biktima nga si Jerry Variacion Bangasao, 44 anyos,minyo nga taga-Sitio Manga,Brgy Sugbongcogon,Tagoloan ning lalawigan.
Gihimo ni Lacasan ang katin-awan nunot sa hugot nga pagduda sa pamilya sa biktima nga dunay foul play ang kamatayon niini sa miaging gabii.
Si Bangasao ang gidetinar sa mini-cell sa kapolisan kay giakusahan nga daw nanglugos sa pasahero niining babaye nga nakasakay sa gimaneho niya nga bao-bao.
Apan ang maong pasangil ang kusganong gihimakak sa pamilya sa biktima kay daw nagtinarong kini sa pagka-amahan ug nanginabuhi nga legal.
Gipangayo sa pamilya sa biktima ang hustisya sa gidangatan niini samtang wala kontraha sa kapolisan apan nasabtan nila ang pagbati niini tungod sa hitabo.
