CAGAYAN DE ORO CITY – Kasuhan sa pamilyang Dumanjog ang pipila ka pulis nga giingong ilegal midakop kang Bonifacio Mayor Samson Dumanjog aron mabakante ang munisipyo ug makalingkod si acting Mayor Ricky Bulahan sa Misamis Occidental.
Kini human nagtoo ang pamilya ni Dumanjog nga nag-abusar ug nagpagamit ang mga pulis sa Bonifacio Police Station sa provincial govt pinaagi sa Sangguniang Panlalawigan suspension order.
Miingon anak ni Dumanjog nga si Tambulig,Zamboanga del Sur Mayor Charlotte Panal nga walay napakita nga papeles ang milusob sa buhatan sa ilang amahan rason nga moduso sila’g kaso sa husgado.
Una nang gi-suspenso sa SP-MisOcc si Dumanjog tungod sa giingong kasong betrayal of public trust apan gi-reverse kini ni Pres Bongbong Marcos ug gipadumduman ang probinsya nga nagdili mag-abusar sa ilang trabaho.
Samtang namugos ang kapolisan nga walay kahiwian nga nahimo ang mga pulis nga nag-uban sa pagsilbi sa 60 days suspension order batok kang Dumanjog sa mismong opisina niini kagahapon sa buntag.
Kini ang depensa sa Police Regional Office 10 kabahin sa pasangil sa kampo sa mayor ug sa nag-viral video diin makita ang komosyon sa duha ka kampo.
Miingon si PRO 10 spokesperson Police Maj. Joann Navarro nga dili sila ang nag-serve sa suspension order apan ang taga-provincial govt ug igo lang sila naghatag seguridad nga dili magkagubot.
Hisayrang walay klaro nga katin-awan o tubag pa niini ang kadagkuan sa DILG 10 nga nakabase dinhi sa syudad.
