(Update) CAGAYAN DE ORO CITY – Duol nang matumbok sa kapolisan ang pinaka-responsable sa pagdunggab-patay sa 19 anyos nga kolehiyala nga sakristan sa simbahan sa Sitio Dinogon,Brgy Sta Ana,Tagoloan,Misamis Oriental.
Kini maoy pagsaysay ni Tagoloan Police Station deputy commander Capt Reczon Talines kabahin sa kasamtangang dagan sa imbestigasyon sa kamatayon ni Lady Grace Galo nga unang nakit-ang wala na’y kinabuhi sa pultahan sa iyang kuwarto niadtong Enero 10 ning tuiga.
Gibutyag ni Talines nga sa tulo ka persons of interest o POIs,usa niini ang makonsidera nga pinakaduol nga suspek sa paghimo sa kremin.
Siya miingon nga ang maong POIs ang gipaagi na sa imbestigasyon ug ipaubos usab sa polygraph tests sulod ning semanaha.
Gihimo sa opisyal ang katin-awan dungan sa paglugwa sa resulta sa otopsiya sa biktima.
Sa maong pakisusi, nasayran nga gawas sa dingguban sa biktima, nagbaton usab kini sa bun-og sa ulo ug pinaakan sa likod nga bahin niini.
Napalig-on pa usab ang unang nasulti sa kapolisan nga wala malugos ang biktima kay negatibo kini sa resulta sa otopsiya.
Sa pagkutlo ning balita, gihulat pa usab ang resulta sa fingerprints ngadto sa kutsilyo nga nakit-an sa crime scene nga gitoohang maoy gigamit pagdunggab ngadto sa biktima.
Dumduman nga gi-demanda sa pamilya sa biktima ingon man sa Tagoloan Community College diin kini nagtungha isip 2nd year college sa kursong Bachelor of Science in Business Administration o BSBA ang dinaliang pagkasulbad sa kaso.
Hisayrang kabahin sa mipaabot sa pakigduyog sa kasub-anan sa gidangatan ni Lady Grace,mismo si Cagayan de Oro Archdiocese Archbishop Jose Cabantan,DD ug Tagoloan Mayor Atty. Nadya Emano-Elipe ang midangat sa haya niini diin sila nag-awhag usab sa mga otoridad nga makab-ot ang hustisya sa hitabo.
