CAGAYAN DE ORO CITY – (update) Daw nahimong inotil ang pwersa sa pulis didto sa Talakag, Bukidnon atol sa paglusad sa rescue operation sa sibilyan nga gipatay sa Guirella Front 6 sa New Peoples Army sa Talakag Bukidnon.
Gi-angkon ni Inspector Edwin Ipan, nga nagkalisud sila sa pagrekober sa patay’ng lawas sa biktimang si Lito Atoy sa KM 28, Sitio Tikalaan, Talakag Bukidnon tungod kay gikulang sila sa pwersa ug posibleng gi-atangan na sila sa mga rebelde nga andam mu-ambush kanila.
Busa, nakapangayo silag tabang kang Talakag Mayor Vergito Factura aron makuha ang lawas ni Atoy.
Una niini, gi-angkon ni Ipan nga muhimo na unta sa ocular investigation ang sakop sa Talakag PNP ug RPSB apan nakadawat report nga nabulit ang crime scene sa kapin 200 ka armadong sakop sa NPA.
Hinoon, malampusong nahaw-as ni Mayor Facturaang patay’ng lawas ni Atoy gikan sa KM 28, Sitio Tikalaan ug anaa na nahiluna sa usa ka punerarya sa Talakag.
Una niini, gi-angkon sa wala nagpa-ilang rebeldeng amazona sa Bombo Radyo nga sila ang reponsable sa kamatayon ni Atoy, kinsa nagbaton sa dagkung salaod sama sa pagpangharas sa mga mag-uuma, pagpangawat, pagpangilkil ug uban pa.
Hisayran nga gisaad pa sa amazona nga ibalik nila sa kapikas sa biktima ang ilang narekober nga kapin P15,000 sa bulsa sa ilang gikonsidirar nga bandido.
