CAGAYAN DE ORO CITY-Gipakusog sa kapolisan ug militar ang road checkpoints sa tanang entrance ug exit roads sa Northern Mindanao.
Kini human nakadawat sa impormasyon ang PNP nga mopalada’g grupo si Maute-ISIS commander Humam Abdul Romato Najid alias Abu Dar aron mohimo’g terror attacks mismo dinhi sa syudad.
Gibutyag ni PNP regional spokesperson Supt Lemuel Gonda nga usa ka alyas Jarir ang giingong gitahasan ni Abu Dar aron mohimo’g divertionary attacks sa syudad.
Nasayran nga naipit na pag-ayo sa militar ang grupo ni Abu Dar sa bukirang bahin sa Tumbaran ug Pagayawan, Lanao del Sur hinungdan milugwa ang maong impormasyon.
Samtang gi-alerto sa National Intelligence Coordinating Agencies o NICA-10 ang publiko batok sa inbibidwal o grupo nga nagdala’g kasamok partikular ning syudad.
Gihimo ni NICA regional director Manuel Ordonia ang pahayag tungod sa sunod-sunod nga bahad sa mga terorista nga bombahan ug samukon ang syudad.
Gani, giangkon ni Ordonia nga high value targets ang nasikop sa Martial Law -Special Action Group o ML-SAG nga magtiayong nurse sa checkpoint sa syudad diin giingong konektado sa teroristang Maute-ISIS.
