CAGAYAN DE ORO CITY – Gimanduan ni Police Regional Office 10 Director Brig Gen Lawrence Coop ang tanang lower units nga itaas ang alerto sa ilang tagsa-tagsa ka mga area of operation.
Kini aron dili makahigayon sa pagpangatake o makapanghasi ang sakop sa NPA rebels nga magsaulog sa ilang anibersaryo ugmang adlawa.
Miingon si PRO 10 spokesperson Police Maj Joann Navarro nga naglihok ang ilang intelligence units alang niini ug nakig-koordinar sa mga sundalo sa 4th ID,Philippine Army.
Una nang dili gusto mahitabo sa PNP nga masubli ang pag-atake sa gatusang mga rebelde sa Binuangan Police Station sa Misamis Oriental diin diriyot mailog apan nakasukol ang mga pulis nga naa sa sulod niini.
Samtang walay gisulti ang 4th ID,Philippine Army nga bisan unsa nga impormasyon kabahin sa posibleng rebel attacks nga himoon sa CPP-NPA batok sa gobierno ilabina sa ilang anibersaryo ugmang adlawa.
Miingon si 4th ID spokpesperson Maj Francisco Garello Jr nga dili nila gusto masugaw ang military operation sa ilang tropa kon dunay mga nasiplatan nga mga paglihok sa mga kaaway sa estado.
Siya miingon nga kon may makuha sila nga mga impormasyon,gilayon nila kini itaho sa pinakadaling panahon sa hingtungdang mga buhatan sa usa ka lugar aron ma-alerto.
