CAGAYAN DE ORO CITY-Gi-depensa ni City Police Director Sr Supt Robert Roy Bahian kon nganong gipaubos nila sa liquor ban ug gidid-a ang paggamit sa flying drones atol sa piyesta sa Black Nazarene sa syudad sunod semana.
Kini tungod sa taas nga bahad sa terror attack nga giatubang sa dakbayan.
Miingon si Bahian nga kon kinsa kadtong masapon nga mosupak sa mando ni City Mayor Oscar Moreno,sikopon ug mag-atubang sa kasong kriminal sa piskalya ning syudad.
Samtang gidid-an ni Moreno ang katawhan nga mohimo’g pag-inom ug paggamit sa flying drones atol sa traslacion sa Itom nga Nazareno sa syudad sa Enero 9.
Miingon si Kag Romeo Calizo,chairman sa police,fire and public safety committee sa konseho nga gilugwa ni Moreno ang maong kamanduan pinaagi sa duha ka executive orders alang sa maong katuyuan.
Gibutyag ni Calizo nga 100 porsiento na sila nga andam sa paghatag seguridad sa bana-banang 250-mil ka deboto nga moduyog sa kapistahan sa Nazareno sunod semana.
Samtang mangayog pagsabot ang Roads and Traffic Administration o RTA gikan sa commuters alayon sa traslacion sa Itom nga Nazareno sa syudad sugod alas 5 sa buntag sa Enero 9.
Gibutyag ni RTA asst administrator Engr Nonito Oclarit nga sirado ang tanan dalan gikan Velez, padulong sa intersection area sa dalang Osmena diin nahimutang ang Sr Jesus Nazareno Church.
Gawas niini, ipatuman usab sa RTA ang tulo ka layering sa ilang deployment aron mahatagan sa igong giya ang mga sakyanan de pampasahero ug pribado nga apektado sa re-routing scheme sa maong adlawa.
Dugtong niini,gihangyo sa City Health Office o CHO ang mga deboto nga nagbaton sa sakit sa kasing-kasing, highblood,mag dunay rayoma o arthritis nga dili na mutambong sa traslacion sa Itom nga Nazareno.
Kuyog sa maong panawagan ang pagdili sa mga senior citizen, mga bata,persons with disabilities ug mabdos nga makatambong sa kapin duha ka oras nga prosesyon.
Gibutyag ni CHO Officer Dra Fe Bongcas nga dili mapasagdan ang kadtong makabaton ug minor injuries ilabina panahon sa pagdasok sa mga deboto kay anaa kanunay sa palibot ang medical teams kuyog sa CDRRMD,PNP ug ubang rescue units.
Dugtong niini, gi-awhag ni Bongcas ang mga relihiyoso ug laygo nga dili magtiniil bisan sa sugo sa ilang balaang tradisyon sa pagtoo.
Kini tungod kay delikado ang dalan sa posibleng nagkatag nga mga bildo nga peligro sa tetanus.
