CAGAYAN DE ORO CITY-Nangayo’g dugang napulo ka adlaw ang kapikas sa napatay’ng si Omar Matue nga si Indonesian national Minhati Madrais alyas Baby alang sa preliminary investigation batok kasong kriminal sa piskalya sa Iligan City.
Kini human nagtinguha si Madrais pagbaton sa kaugalingong pribadong abogado nga molaban sa iyang kasong illegal possession of explosives.
Miingon si Iligan City Police Director Sr/Supt Leony Roy Ga nga ang gihimo nga lakang ni Madrais ang subay usab sa rekomendasyon sa Indonesian Consulate Office nga unang nakabisita kaniya sa bilangguan ning semanaha.
Si Madrais ang giila sa militar nga secret terror fighter nga unang gipatago ni Omar sa Iligan City apan nadakpan niadtong miulbo ang giyera sa Marawi City.
