CAGAYAN DE ORO CITY – Gibulgar sa kapolisan nga posibleng patay na si Cadet 4th Class Darwin Dormitorio ayha gidala sa PMA Station Hospital sa Baguio City.
Sumala ni Baguio City Police Office Director Police Col Allen Rae Co nga adunay timailhan nga mga alas-2:00 hangtud alas-4:00 sa kadlawon, nawad-an na’g kinabuhi si Darwin sulod sa iyang quarter o room niadtong Setyembre 18.
Una nang gidala si Dormitorio sulod sa ospital niadtong September 17 dihang nakaangkon kini’g grabe nga bun-og sa kalawasan human gikulata sa iyang upperclass men.
Sa pagkakaron, gihulatan na lamang sa PNP ang pamilyang Dormitorio nga magsilbing private complainant sa kasong violation of anti-hazing law batok sa mga suspek nga sila si Cadet 1st Class Axl Ray Sanupao,Cadet 3rd Class Shalimar Imperial,Felix Lumbag ug Cadet 2nd Class Nickoel Termil nga prime suspects sa kamatayon ni Darwin.
Samtang gihagit ni kanhi IBP Cagayan de Oro-MisOr chapter Pres Atty. Eddie Cuaresma ang gobyerno nga pangitaag solusyon ang problema sa hazing sulod sa Philippine Military Academy.
Kini tungod kay bisan may anti-hazing law 2018 na nga naghatag bag-ut nga silot ug multa sa mga makasupak niini,naghitak gihapon ang pagmaltrato sama sa gidangatan ni Dormitorio.
Miingon si Cuaresma nga kon dili makaya ang pagpaundang sa hazing sa PMA, mas maayo nga bungkagon na lamang ang maong balaod.
