CAGAYAN DE ORO CITY – Gikondisyonan ni PNP chief Gen Nicolas Torre III ang iyang mga pulis nga mohatag sa makatagbaw nga serbisyo ngadto sa katawhan sa tibuok nasud.
Kini bugti sa pag-epekto na sa walo ka oras na lang nga pag-trabaho matag-adlaw apan sulod sa tulo ka work shifting aron adunay igong panahon usab sa ilang pamilya.
Miingon si PRO 10 spokesperson Major Joann Navarro nga gusto ni Torre nga mangunay pag-supervise niini ang ilang provincial ug city police directors.
Kini sa pagsiguro nga masunod ang 3 to 5 minutes response time sa higayon adunay panginahanglan sa pagtubag sa emerhensiya gikan sa katawhan.
Tipik sa gimando usab ni PRO 10 Director Brig Gen Jaysen De Guzman ang paghatag sa igong seguridad sa pagbukas na’g balik sa mga klase sa mga estudyante sa mga publikong mga tunghaan sugod Hunyo 16 ning tuiga sa Northern Mindanao.
