CAGAYAN DE ORO CITY – Gitawag nga ni City Mayor Oscar Moreno nga ilegal ang kamanduan sa PNP nga mokuha pa’g travel pass ang mga residente nga may mga biyahe pasulod ug gawas sa syudad ingon man sa Misamis Oriental.
Miingon si Moreno nga dili makiangayon nga lisud-lisuron pa sa gobierno ang katawhan pinaagi sa pagpakuha sa travel pass ning panahon sa pandemya dala sa coronavirus disease.
Dugang sa mayor nga kinahanglanon lamang ang travel pass kon gikan sa Misamis Oriental o Cagayan de Oro padulong sa laing mga probinsya sa rehiyon.
Samtang gibarugan sa Police Regional Office 10 ang kamanduan nga ipakuha’g travel pass ang katawhan ayha makasulod sa syudad o lalawigan.
Kini bisan kon dako nga bikil alang sa katawhan ang maong rekisito isip pangontra sa coronavirus disease.
Miingon si PRO-10 spokesperson Lt Col Mardi Hortillosa nga gisunod lamang nila ang direktiba sa Camp Crame kinsa gitahasan sa IATF kabahin niini.
Una usab niini,bisan si Gov Bambi Emano ang nagmando na nga walay travel authority nga kinahanglanon sa mga biyahidor aron makasulod sa Misamis Oriental.
