CAGAYAN DE ORO CITY – Hayan hingpit nang mapahunong ang pagpakuha sa PNP sa katawhan sa travel authority ayha tugtan maka-biyahe paggawas-pasulod sa syudad ug lalawigan.
Kini human direkta nga gikutay ni City Mayor Oscar Moreno si PNP Deputy Director Maj Gen Emmanuel Luis Licop aron hangyuon nga dili na ipakuha’g travel authority ang katawhan aron kalikayan ang dugang pershisyo epekto sa coronavirus disease.
Gibarugan ni Moreno nga dili na angay ipakuha’g pagtugot sa PNP ang publiko sanglit ubos lamang sa usa ka geographical location ang Cagayan de Oro City ug Misamis Oriental.
Samtang hulaton sa Police Regional Office 10 ang bag-o nga direktiba gikan sa Camp Crame kabahin sa issuance sa travel authority nga kusganong gisupak ni City Mayor Oscar Moreno alang sa katawhan sa syudad.
Kini human tahasi ang PNP sa Inter-Agency Task Force nga pangitaan ang mga biyahidor sa maong dokumento ayha makasulod sa lugar ilang padulngan.
Miingon si PR0 10 spokesperson Lt Col Mardi Hortillosa nga kanunay sila mosulod kon unsa man ang imando sa ilang kadagkuan.
Gani,malipay ang PNP kon ipahunong na ang pagpanghatag niini aron maka-pokus sila sa laing trabaho ning panahon sa pandemya.
