CAGAYAN DE ORO CITY – Gipasalig sa kapolisan nga dili pasagdan ang kahimtang ug ang seguridad sa kapikas sa terorr leader Omar Maute nga si Minhati Madrais alyas Baby samtang detinado sa Iligan City.
Kini human unang mihangyo ang representante sa Indonesian Embassy sa PNP sa kahimtang ni Madrais pipila ka adlaw gikan sa pagkasikop niini.
Gibutyag ni Iligan City Police Office Director Sr/Supt Leony Roy Ga nga gani gisulod nila sa kampo sa kapolisan sa Camp Tomas Cabili ang suspek aron dili basta-basta mamiligro ang seguridad niini.
Si Madrais ang nasikop sa hiniusang AFP-PNP operations sa safehouse sa usa ka subdivision sa Brgy Tubod,Iligan City sa miaging adlaw’ng Domingo.
Samtang andam kanunay si Ga kun ugaling imando ni PNP chief Gen Ronald dela Rosa nga ipadala sa kauluhan si Madrais.
Matud ni Ga nga magpabilin una sa iyang kustodiya ang dinakpan samtang naghulat mando gikan sa central office.
Gipasalig ni Ga nga dili na makaggawas sa bilangguan si alyas Baby ilabina nga adunay gihuptang lig-on nga ebidensiya ang PNP intelligence group sa iyang gakalambigitan sa nahitabong kagubot sa Marawi City.
