CAGAYAN DE ORO CITY – Dili na makapausab sa kabug-at sa kaso kon ugaling may mohimo’g pagbahad sa kinabuhi sa pamilyang Dormitorio nga mikaso batok sa pito ka kadete sa PMA.
Kini ilabina nga usa sa mga suspetsado ang anak usab sa army colonel nga gradwado gihapon sa PMA sa tuig 1991.
Gibutyag ni Baguio City Police Office Director Col Allen Rae Co nga walay makuha ang bisan kinsa nga mohimo’g bahad sa kinabuhi sa pamilya ni Cadet Darwin Dormitorio tungod sa pagpangayo nila’g hustisya sa nahitabo niini.
Dugang ni Co nga isip public complainant ang PNP sa kaso,tuyo nila nga makonbikto sa kasong violation sa anti-hazing law,murder ug torture ang mga magsilbing akusado sa kremin.
Gitambagan na lamang ni Co ang pipila ka indibidwal nga nagtinguha pagbulabog sa kaso nga ipalig-on ang ilang depensa batok sa mga ebedensiya nga posibleng magduot kanila sa pagkabilanggo sulod sa New Bilibid Prison.
